Gwasanaeth Chwarae ac Ieuenctid Wrecsam, ICE Cymru a Gwasanaeth Cefnogi Ieuenctid Sir Gâr yw'r sefydliadau diweddaraf i gael y Marc Ansawdd ar gyfer Gwaith Ieuenctid yng Nghymru.

Yn dilyn asesiadau ddiwedd 2022 mae ICE Cymru wedi cael y marc ansawdd efydd, Gwasanaeth Chwarae ac Ieuenctid Wrecsam wedi cael yr arian, a Gwasanaeth Cefnogi Ieuenctid Sir Gâr yr aur.

Mae'r Marc Ansawdd (a weinyddir gan Gyngor y Gweithlu Addysg (CGA)), yn wobr genedlaethol sy'n arddangos ardderchowgrwydd sefydliad. I gael achrediad, mae'n rhaid i sefydliadau gwaith ieuenctid hunanasesu yn erbyn set o safonau ansawdd, a phasio asesiad allanol.

Dywedodd Tomas Phillips, Rheolwr Academi ICE ar gyfer ICE Cymru "Mae cael y Marc Ansawdd yn fraint enfawr. Mae'n destament i'r gwaith ry'n ni'n ei wneud a'r tîm tu ôl iddo. Mae'r broses wedi bod yn un o addysg a ffocws. Ry'n ni nawr yn edrych ymlaen at barhau i wella ein gwaith a'r hyn ry'n ni'n ei gynnig."

Dywedodd Andrew Borsden, Swyddog Datblygu'r Marc Ansawdd yn CGA "Trwy gydol eu hasesiadau, arddangosodd pob tîm eu hymrwymiad i gyflawni gwaith ieuenctid o ansawdd uchel. Roedd ysgogiad a brwdfrydedd y staff yn bleser i'w weld - llongyfarchiadau i bawb."

Yn yr wythnosau nesaf mae Gwasanaethau Ieuenctid Castell-nedd Port Talbot yn cael eu hasesu am eu cais am yr arian, a Princes Trust Cymru, a Plant y Cymoedd.

I gael mwy o wybodaeth ar y Marc Ansawdd, gan gynnwys manylion ar sut gall eich sefydliad chi wneud cais i gael eich achredu, ewch i wefan CGA.