Mae Gwasanaeth Ieuenctid Caerffili wedi derbyn cydnabyddiaeth ffurfiol am ansawdd eu darpariaeth, gan dderbyn y Marc Ansawdd Aur ar gyfer Gwaith Ieuenctid yng Nghymru (y Marc Ansawdd).

Cyflwynwyd y wobr fawreddog gan asesydd y Marc Ansawdd, Catrin James, mewn seremoni arbennig lle’r oedd pobl amlwg leol, staff ieuenctid, aelodau’r gymuned a phobl ifanc sy’n ymwneud â’r gwasanaeth yn bresennol.

Mae’r Marc Ansawdd (sy’n cael ei weinyddu gan Gyngor y Gweithlu Addysg (CGA)) yn ddyfarniad cenedlaethol sy’n dangos rhagoriaeth sefydliad. I dderbyn yr achrediad, rhaid i sefydliadau gwaith ieuenctid asesu eu hunain yn erbyn cyfres o safonau ansawdd a phasio asesiad allanol.

Dros y 18 mis diwethaf, mae tîm Caerffili wedi cyflawni tair lefel y Marc Ansawdd – efydd, arian a, nawr, aur.

Yn ystod ei chyflwyniad, crynhodd Catrin fod y tîm yn broffesiynol, yn benderfynol ac yn ofalgar. Fe wnaeth elfennau o adroddiad terfynol yr asesydd gynnwys cymaint yr oedd ymrwymiad y staff, y gwirfoddolwyr a’r grŵp arwain wedi creu argraff dda arnynt. Teimlont fod proffesiynoldeb y staff yn cynnig sylfaen o gydymffurfio ag egwyddorion a dibenion gwaith ieuenctid yng Nghymru, a bod arfer cynhwysol a chydraddoldeb yn rhan annatod o DNA y staff.

A hithau’n siarad ar ôl y cyflwyniad, dywedodd Catrin “Mae hi wedi bod yn hyfryd bod yma’n dathlu llwyddiannau Gwasanaeth Ieuenctid Caerffili yma yn agoriad eu canolfan ieuenctid newydd ym Mharc Virginia.

“Yn yr adroddiad, galwodd yr aseswyr y gwasanaeth yn aruthrol, a chlodfori ymrwymiad y staff, a pha mor ofalgar mae nhw tuag at y bobl ifanc a’r gwirfoddolwyr, yn ogystal â’i gilydd. Mae popeth mae nhw’n ei wneud er budd y bobl ifanc.”

Ynghyd â chydnabod cyflawniadau’r gwasanaeth, mae’r dyfarniad hefyd yn cydnabod ac yn dathlu cyflawniadau pobl ifanc, yn ogystal â’r effaith y mae gwaith ieuenctid a gweithwyr ieuenctid wedi’i chael ar eu teithiau personol.

Dywedodd y Cynghorydd Jamie Pritchard, Dirprwy Arweinydd ac Aelod Cabinet dros Ffyniant, Adfywio a Newid yn yr Hinsawdd, “Mae’n fendigedig agor Canolfan Ieuenctid Parc Virginia yn swyddogol a dathlu bod Gwasanaeth Ieuenctid Caerffili wedi cyflawni’r Marc Ansawdd Aur. Rwy’n anfon fy llongyfarchiadau i bawb sy’n gysylltiedig am y gamp ragorol hon.”

I gael mwy o wybodaeth am y Marc Ansawdd, gan gynnwys sut gall eich sefydliad ennill achrediad, neu sut gallwch chi fod yn asesydd, ewch i wefan CGA.

Mae Cyngor y Gweithlu Addysg (CGA) wedi cyhoeddi ei Gynllun Strategol 2024-27 a’i Gynllun Cydraddoldeb Strategol 2024-28.

Mae’r ddwy ddogfen yn amlinellu sut bydd rheoleiddiwr proffesiynol, annibynnol y gweithlu addysg yng Nghymru’n cyflawni ei swyddogaethau statudol craidd yn effeithiol, yn effeithlon ac yn gynaliadwy, gan sicrhau cydraddoldeb a thegwch drwyddi draw.

Caiff blaenoriaethau ac amcanion CGA ar gyfer y tair blynedd nesaf, yn unol â’i rôl a’i gylch gwaith statudol, eu cynnwys yng Nghynllun Strategol 2024-27. Hefyd, mae’n pwysleisio gweledigaeth CGA, sef bod yn rheoleiddiwr proffesiynol, annibynnol, dibynadwy, sy’n gweithio er budd y cyhoedd i gynnal proffesiynoldeb a gwella safonau o fewn y gweithlu addysg yng Nghymru.

Yn cyd-fynd â hyn yn agos, nod y Cynllun Cydraddoldeb Strategol yw adeiladu ar y cynnydd a gyflawnwyd hyd yn hyn ac mae’n esbonio sut bydd CGA yn gweithio i hyrwyddo cydraddoldeb ac amrywiaeth trwy bum amcan strategol uchelgeisiol.

Adeg lansio’r ddau gynllun, dywedodd Hayden Llewellyn, Prif Weithredwr CGA, “Gyda thros 90,000 o ymarferwyr addysg wedi’u cofrestru gyda ni erbyn hyn, mae’n hanfodol mai cofrestru a rheoleiddio cadarn yw ein blaenoriaeth o hyd.  

“Fodd bynnag, mae’r cynlluniau hyn yn mynd ymhellach. Maent yn amlinellu sut byddwn yn parhau i hyrwyddo gyrfaoedd yn y gweithlu addysg trwy fentrau fel Addysgwyr Cymru, darparu arweiniad ac adnoddau i’n cofrestreion, a chynnal a chryfhau ymhellach ein presenoldeb mewn grwpiau a phwyllgorau cenedlaethol allweddol, gan gynnig tystiolaeth a chyngor cadarn.

“Mae’r cynlluniau hyn yn deillio o gydweithredu, ymgynghori a myfyrio helaeth, ac amlinellant ein gweledigaeth ar gyfer y dyfodol yn glir, gan amlygu amcanion a mentrau allweddol a fydd yn llywio ein hymdrechion.”

Datblygwyd y cynlluniau hyn mewn ymgynghoriad â chofrestreion, rhanddeiliaid ar draws y sector addysg ehangach, y cyhoedd, ac aelodau Cyngor a staff CGA.

Maent ar gael i’w darllen ar wefan CGA ynghyd â chyfres lawn o ddogfennau corfforaethol.

Fideo: Hayden Llewellyn, Prif Weithredwr CGA, yn lansio ein Cynllun Strategol ar gyfer 2024-2027 a’i Gynllun Cydraddoldeb Strategol 2024-28

Mae Llywodraeth Cymru wedi ailgomisiynu Cyngor y Gweithlu Addysg (CGA), mewn partneriaeth ag ETS Cymru, i gyflwyno a datblygu’r Marc Ansawdd ar gyfer Gwaith Ieuenctid yng Nghymru, a gydnabyddir yn genedlaethol, hyd nes mis Mawrth 2025.

Mae’r Marc Ansawdd yn ddyfarniad cenedlaethol sy’n cefnogi ac yn cydnabod gwelliant mewn safonau yn narpariaeth a pherfformiad sefydliadau sy’n cyflwyno gwasanaethau gwaith ieuenctid. Er mwyn derbyn yr achrediad, mae’n rhaid i sefydliadau gwaith ieuenctid asesu eu hunain yn erbyn set o safonau ansawdd, a phasio asesiad allanol.

Ers dyfarnu’r contract iddynt yn wreiddiol yn 2020, mae CGA wedi:

• cwblhau 60 o asesiadau
• hyfforddi 297 o weithwyr ieuenctid/gweithwyr cymorth ieuenctid
• hyfforddi grŵp o 46 o aseswyr

Meddai Andrew Borsden, Swyddog Datblygu CGA ar gyfer y Marc Ansawdd “Mae datblygu’r Marc Ansawdd dros y pedair blynedd diwethaf wedi bod yn bleser gwirioneddol. Yn ystod y cyfnod hwn, mae CGA wedi cael y fraint o fod yn dyst i enghreifftiau rhagorol o waith ieuenctid, ac mae cydnabod y cyflawniadau hyn yn ffurfiol trwy ddyfarniad mor fawreddog yn foddhaol tu hwnt”.

Fel corff dyfarnu, bydd CGA yn parhau i weithio gyda 37 deiliad presennol y Marc Ansawdd, a sefydliadau newydd, i barhau i ddatblygu a thyfu’r broses wobrwyo.

Meddai Hayden Llewellyn, Prif Weithredwr CGA “Mae contract y Marc Ansawdd wedi bod yn brosiect heriol ond cyffrous i Gyngor y Gweithlu Addysg (CGA) ymwneud ag ef.

“Fel rheoleiddiwr proffesiynol, annibynnol y gweithlu addysg yng Nghymru, mae’n wych gallu arddangos a chydnabod y sefydliadau hynny sy’n arddangos safonau ymddygiad ac ymarfer uchel.

“Edrychwn ymlaen at weithio gyda phartneriaid i sicrhau bod y sector gwaith ieuenctid yn parhau i ffynnu a chael effaith gadarnhaol ar fywyd pobl ifanc ar draws y wlad”.

Dywedodd Steve Drowely, Cadeirydd ETS "Ry'n ni wrth ein bodd bod y contract ar gyfer Marc Ansawdd ar gyfer Gwaith ieuenctid yng Nghymru wedi ei roi i CGA unwaith eto.

"Ry'n ni yn ETS wedi gweithio mewn partneriaeth hapus gyda'n cydweithwyr yn CGA am y tair blynedd diwethaf. Ry'n ni wedi gweld twf yn y Marc Ansawdd mewn sefydliadau sector a gynhelir a gwirfoddol, a'r effaith gadarnhaol mae hyn yn ei gael ar hyrwyddo safonau uchel er budd pobl ifanc Cymru.

"Rydym yn edrych ymlaen at gydweithio'n agos gyda CGA yn ystod cam nesaf y Marc Ansawdd i sicrhau bod gwaith ieuenctid o'r safon uchaf ar gael i bobl ifanc ym mhob cwr o Gymru."

Cewch ddysgu rhagor am y Marc Ansawdd ar gyfer Gwaith Ieuenctid ar wefan CGA.

O dan ddeddfwriaeth, y ffi flynyddol i'r rheiny sydd angen cofrestru gyda CGA yw £46, waeth bynnag fo'r categori cofrestru. Mae hyn yn golygu mai ffi cofrestru CGA yw un o'r isaf o unrhyw broffesiwn ledled y DU, ac ar draws y byd, ac nid yw wedi codi ers i ni gael ein sefydlu yn 2015, er bod costau wedi codi'n sylweddol.

Hyd at a chan gynnwys cyfnod cofrestru 2023/24, mae Llywodraeth Cymru wedi darparu cyfraniad i bob cofrestrai tuag at eu ffi flynyddol, a elwir yn gymhorthdal. Mae hyn wedi golygu bod unigolion wedi talu £15 neu £45 y flwyddyn i gofrestru, yn ddibynnol ar eu categori cofrestru.

Mae'r darlun ariannol yng Nghymru ar hyn o bryd yn golygu bod rhaid i Lywodraeth Cymru wneud penderfyniadau cyllido anodd. Rydym wedi cael gwybod na fyddant yn darparu'r cymhorthdal i'r ffi cofrestru ar gyfer blwyddyn ariannol 2024/25.

Rydym yn deall yr effaith ariannol allai hyn ei gael arnoch chi. O'r herwydd, mae CGA wedi cytuno i sicrhau'r golled yn y cyfraniad i'n cofrestreion am un flwyddyn, gan ddefnyddio cronfeydd wrth gefn, sy'n golygu y bydd y ffi mae unigolion yn talu i gofrestru yn aros yr un peth ar gyfer 2024/25.

Rhaid nodi nad yw hyn yn opsiwn cynaliadwy yn yr hirdymor. Dim ond oherwydd ein bod ni, fel nifer o sefydliadau eraill, wedi gweld cwymp yn ein gwariant yn ystod pandemig COVID-19, y gallwn wneud hyn ar gyfer 2024/25.

Fel rheoleiddir annibynnol, proffesiynol, mae gofyn i ni gadw digon o gronfeydd wrth gefn ar gyfer costau cynnal ac ymrwymiadau contract, pe bai unrhyw beth anrhagweladwy ddigwydd. Mae hyn i sicrhau ein bod yn gallu parhau i ddarparu gwasanaeth effeithiol ac effeithlon yn rheoleiddio ym mudd y cyhoedd i ddiogelu dysgwyr a phobl ifanc.

Byddwn yn parhau i rannu diweddariadau am hyn gyda'n cofrestreion a'n rhanddeiliaid, wrth iddynt fod ar gael.