Cyn gwneud cais

Rhaid i bob rhaglen a gyflwynir i’w hachredu fodloni’r Meini prawf ar gyfer achredu rhaglenni Addysg Gychwynnol Athrawon (AGA) yng Nghymru a bennir gan Lywodraeth Cymru. Fodd bynnag, cyn gwneud cais, mae’n ofynnol i bartneriaethau gyflwyno ffurflen datganiad o fwriad i’r Bwrdd Achredu AGA.

Rhaid i bob rhaglen dderbyn cymeradwyaeth prifysgol cyn iddynt gael eu cyflwyno.

Pryd i wneud cais

Fel rheol, dylai partneriaethau sicrhau bod pob rhaglen AGA newydd yn cael eu cyflwyno o leiaf 18 mis cyn dyddiad cychwyn disgwyliedig y rhaglen gan ddefnyddio’r profforma priodol. Er enghraifft, dylid cyflwyno rhaglenni sy’n dechrau ym mis Medi 2027 erbyn mis Mawrth 2026. 

Achredu

Mae’r canllawiau ar gyfer  cyflwyno rhaglen o Addysg Gychwynnol Athrawon i CGA i’w hachredu yn amlinellu’r broses o wneud cais ac asesu rhaglenni ar gyfer achrediad. Dylid cwblhau’r ffurflen ar gyfer cyflwyno rhaglen AGA i'w hachredu hefyd.

Monitro rhaglenni AGA

Mae holl raglenni AGA a gynigir gan bartneriaethau yng Nghymru yn cael eu hasesu, gwerthuso a monitro yn erbyn Meini prawf Llywodraeth Cymru ar gyfer achredu rhaglenni Addysg Gychwynnol Athrawon (AGA) yng Nghymru.

Mae’r canllawiau monitro yn amlinellu’r dull cyn, yn ystod ac ar ôl unrhyw weithgarwch monitro. Dylid cwblhau'r ffurflen newid, gan nodi pob newid a wnaed i'r rhaglen.

Bydd Estyn a CGA yn rhannu gwybodaeth a ddarperir gan y partneriaethau i’w harchwilio neu eu hachredu/monitro, i leihau baich diangen ar gyfer y partneriaethau, ac i hysbysu a galluogi gwelliannau o fewn y sector. Bydd cynrychiolwyr CGA ac Estyn yn ffurfio rhan o’r sesiynau adborth ar gyfer ymweliadau achredu, monitro ac archwilio. Bydd y ddau sefydliad yn cael gwybod canlyniadau’r sesiynau hyn yn unol â’n gweithdrefnau rhannu gwybodaeth. Rhennir gwybodaeth yn y modd yma i helpu gwella ansawdd darpariaeth AGA, a lleihau baich diangen i bartneriaethau.

Ailachredu

Caniateir i bartneriaethau AGA wneud cais am ailachrediad unwaith yn ystod cyfnod o achrediad rhaglen o Addysg Gychwynnol Athrawon. Mae’r canllawiau ar gyfer cyflwyno rhaglen o Addysg Gychwynnol i CGA ar gyfer ailachredu yn amlinellu’r broses o wneud cais ac asesu. Dylid cwblhau’r ffurflen ar gyfer ailachredu rhaglen AGA hefyd.

Gwneud newidiadau i raglen

Os oes partneriaeth yn dymuno gwneud newidiadau sylweddol i raglenni achrededig, mae’n rhaid ein hysbysu’n ysgrifenedig. Dylid gwneud hyn drwy ddefnyddio’r ffurflen Hysbysiad o newid mawr i raglen AGA.

Tynnu statws achrededig yn ôl

Os na fydd rhaglen yn cyrraedd y safonau disgwyliedig o ddarpariaeth, neu lle bod partneriaeth yn dewis peidio â chynnig rhaglen mwyach, byddwn yn rhoi ein canllawiau ar gyfer tynnu statws achrededig rhaglenni Addysg Gychwynnol Athrawon (AGA) yn ôl, ar waith.

Ffioedd achredu

Rhaid i bob partneriaeth sy’n cyflwyno rhaglen ar gyfer achredu, neu sydd â rhaglen achrededig sy’n gofyn am ymweliad adolygu neu fonitro dalu’r ffi briodol i ni.