Pa mor hir yw’r cyfnod sefydlu?

Rhaid i ANG a gyflogir amser llawn gwblhau tri thymor ysgol. Rhaid i ANG a gyflogir rhan amser, neu’r rheiny sy’n cyflawni cyfnod Sefydlu trwy waith cyflenwi byrdymor gwblhau 380 o sesiynau. Diffinnir sesiwn fel bore neu brynhawn llawn o gyflogaeth mewn ysgol.

A oes terfyn amser ar gwblhau cyfnod Sefydlu?

Nid oes terfyn amser ar ba mor hir y bydd yn ei gymryd i gwblhau cyfnod Sefydlu. Ar ôl i ANG gael ei gofrestru gyda CGA rhaid i bob cyfnod o gyflogaeth a gyflawnir fel athro cymwysedig o un sesiwn neu ragor gyfrif tuag at Sefydlu a rhaid iddo gael ei gofnodi gyda CGA. Nid oes dim hyblygrwydd ynghylch hyn ac ni all ANG nac ysgolion ofyn am i gyfnod o gyflogaeth a gwblheir fel athro cymwysedig beidio â chyfrif.

A all gwaith goruchwyliwr cyflenwi gyfrif tuag at sefydlu?

Na all, dim ond cyfnodau o gyflogaeth a gyflawnir fel athro cymwysedig all gyfrif tuag at Sefydlu.

Sut ydw i’n cyrchu fy mhroffil Sefydlu?

Yn gyntaf rhaid hysbysu CGA eich bod yn cyflawni cyfnod Sefydlu. Ar gyfer ANG a gyflogir mewn ysgolion dylid cyflwyno’r Ffurflen Hysbysu Sefydlu. Ar gyfer ANG cyflenwi byrdymor, dylid cyflwyno’r Ffurflen Hysbysu Sefydlu fel Athro Cyflenwi Byrdymor.

Ar ôl inni brosesu’r ffurflenni, bydd angen ichi greu cyfrif ar-lein gyda CGA trwy 'FyCGA'. Cyn creu’ch cyfrif rhaid ichi fod yn siŵr bod gan CGA y cyfeiriad e-bost mwyaf cyfredol ar eich cyfer, ni fyddwch yn gallu creu/cyrchu’ch cyfrif hebddo

Sicrhewch eich bod yn mewngofnodi i’ch cyfrif yn yr iaith (Cymraeg neu Saesneg) yr ydych eisiau cyflawni’ch Proffil Sefydlu ynddi.

Beth sy’n digwydd os ydw i’n symud ysgol yn ystod fy nghyfnod sefydlu?

Rhaid cyflwyno’r Ffurflen Hysbysu Sefydlu i CGA cyn pen 10 diwrnod gwaith ar ôl dechrau eich cyflogaeth yn yr ysgol. Dylai’ch hen ysgol hefyd gyflwyno’r Ffurflen Hawlio Cyllid Sefydlu i CGA fel y gallwn ddiweddaru’ch cofnod gyda nifer y sesiynau y gwnaethoch eu cwblhau yn yr ysgol.

Beth sy’n digwydd os yw fy nghyflogaeth yn fy ysgol yn dod i ben yn ystod fy nghyfnod sefydlu?

Dylid cyflwyno’r Ffurflen Hawlio Cyllid Sefydlu pan ddaw eich cyflogaeth i ben. Yna bydd CGA yn diweddaru’ch cofnod â nifer y sesiynau a gwblhawyd, ac os yw’n berthnasol yn rhyddhau cyllid i’r ysgol ar gyfer y cymorth Sefydlu a ddarparwyd.

Os ydych chi’n symud i ysgol newydd rhaid cyflwyno’r Ffurflen Hysbysu Sefydlu i CGA cyn pen 10 diwrnod gwaith ar ôl i’ch cyflogaeth ddechrau yn eich ysgol newydd.

Os byddwch yn parhau â’ch cyfnod Sefydlu trwy waith cyflenwi byrdymor yna rhaid cyflwyno’r Ffurflen Hysbysu Athro Cyflenwi Byrdymor cyn pen 10 diwrnod gwaith ar ôl eich sesiwn gyntaf o waith addysgu cyflenwi.

Sut ydw i’n dechrau cyfnod sefydlu?

I ddechrau cyfnod Sefydlu rhaid bod gennych Statws Athro Cymwysedig (SAC) a rhaid ichi fod wedi’ch cofrestru gyda CGA yng nghategori athro ysgol. Os ydych wedi’ch cyflogi mewn ysgol rhaid cyflwyno’r Ffurflen Hysbysu Sefydlu i CGA cyn pen 10 diwrnod gwaith ar ôl i’ch cyflogaeth ddechrau. Os ydych yn cyflawni gwaith cyflenwi byrdymor yna rhaid cyflwyno’r Ffurflen Hysbysu Sefydlu fel Athro Cyflenwi Byrdymor i CGA cyn pen 10 diwrnod gwaith ar ôl eich sesiwn gyntaf o waith addysgu cyflenwi.

Pryd fydd Gwiriwr Allanol yn cael ei ddyrannu imi?

Ar ôl inni gael eich Ffurflen Hysbysu dyrannir gwiriwr allanol (GA) ichi. Cliciwch yma i gael manylion am sut y dyrennir y gwiriwr allanol

Sut fydd fy ngwiriwr allanol yn cysylltu â mi?

Os ydych wedi’ch cyflogi mewn ysgol bydd eich gwiriwr allanol yn cysylltu â’ch ysgol er mwyn trefnu amser cyfleus i gyfarfod â chi a’ch mentor sefydlu.

Os ydych yn cyflawni cyfnod Sefydlu trwy waith cyflenwi byrdymor bydd eich gwiriwr allanol yn cysylltu â chi yn uniongyrchol trwy e-bost. Os oes unrhyw newidiadau i’r cyfeiriad e-bost a roesoch ar y ffurflen hysbysu, dylech roi gwybod i’r tîm Datblygiad Proffesiynol a Chyllid.

Sut mae fy Mentor Sefydlu yn cyrchu fy Mhroffil Sefydlu?

Bydd CGA yn creu mynediad ar-lein ar gyfer Mentoriaid Sefydlu ar ôl cael y Ffurflen Hysbysu Sefydlu. Caiff neges e-bost weithredu ei hanfon i gyfeiriad e-bost y Mentor Sefydlu a nodir ar y Ffurflen Hysbysu. Bydd y neges e-bost yn cynnwys yr enw defnyddiwr a dolen er mwyn creu cyfrinair. Bydd Mentoriaid Sefydlu’n mewngofnodi i’w cyfrif gan ddefnyddio’r sgrin mewngofnodi Mentoriaid Sefydlu.

Dim ond am 48 awr mae’r neges e-bost weithredu a anfonir yn ddilys. Os oes unrhyw broblemau wrth greu’r cyfrif ar-lein Mentoriaid Sefydlu dylech gysylltu â’r tîm Datblygiad Proffesiynol a Chyllid.

Sut ydw i’n cofnodi fy sesiynau cyflenwi byrdymor tuag at fy nghyfnod Sefydlu?

Ni fyddwch yn gallu cofnodi sesiynau cyflenwi byrdymor ond os ydych eisoes wedi cyflwyno’r Ffurflen Hysbysu Sefydlu fel Athro Cyflenwi Byrdymor i CGA. Dylid cofnodi sesiynau cyflenwi byrdymor gyda CGA heb fod yn hwyrach na 15 diwrnod gwaith ar ôl y dyddiad cwblhau.

• Ewch i 'FyCGA'
• Dilynwch y cyfarwyddiadau ar y sgrin i greu cyfrif neu os ydych eisoes wedi creu cyfrif mewngofnodwch;
• dewiswch ‘Fy Nghofnod Ymarferydd Cofrestredig’;
• dewiswch y botwm ‘Gweld Manylion Sefydlu’;
• sgroliwch i waelod y dudalen a dewiswch ‘Diweddaru sesiynau sefydlu – cyflenwi byrdymor’;
• Caiff gwybodaeth y sesiwn ei diweddaru ar eich cofnod cyn pen un diwrnod gwaith.

Hefyd bydd angen i bob sesiwn a gofnodwch fel athro cyflenwi byrdymor gael ei gwirio gan y Pennaeth yn yr adran 'cofnod cyfnod sefydlu' yn y proffil sefydlu (y dylid ei gynnal oddi ar lein a’i lanlwytho i’r proffil ar-lein yn unol â’r amserlenni gofynnol).

Sut ydw i’n cael gwybod am y cymorth y dylwn fod yn ei gael yn ystod y cyfnod Sefydlu?

Mae canllawiau Llywodraeth Cymru ‘Ymsefydlu ar gyfer athrawon newydd gymhwyso yng Nghymru (diwygiwyd Gorffennaf 2017)’ yn nodi’r rolau a’r cyfrifoldebau i bawb sy’n ymwneud â’r rhaglen Sefydlu yng Nghymru. Mae hefyd yn nodi’r cymorth y mae gan ANG hawl iddo yn ystod y cyfnod Sefydlu.